il racconto della domenica

LA TROVATELLA

Etta Zet, trovatella, dopo la dura scola elementare religiosa là de le Carmelitane scalse ze stada mandada a soli quindeze ani a servissio de la contessa Gaby von Presnitz e del di lei marito colonel degradà Hugo Hamburg.

Etta iera magra come un ciodo de tanta fame che gaveva patì, oltre che rachitica el peto in dentro la panza picia tonda in fora uso terso mondo e le culatine fiape come mandarini strucai. In una parola una bela mula, almeno ai oci de sto disgrassià de colonel Hugo che tuta vita ga dovesto sorbirse quel orendo scorfano de la Gaby che la ga sposada solo per soldi e per titolo che pò el ze ga acorto che soldi no iera e anca el titolo iera dubio fufignà.

Bon la contessa Gaby la ze ocupava solo de canasta e ogni zorno da le tre a le oto de dopopranso iera cran bater carte con le sue tre amiche duchessa Asburgica Lorena, marchesa Lorena Asburgo e Pinucia. El colonel el iera sta tuta la sua cariera in fureria de tanto che el gaveva paura de le armi ma fin de la sua ombra istessa. E i conta i sui amici che una volta che i lo ga ciamà in comission dissiplina causa che nol gaveva visto che passava el zeneral Ucci Fossombrone e conseguentemente nol lo gaveva saludato insomma el ze la iera fata addosso ma no metaforicamente bensì sustanzialmente ragion per la quale iera stato degradà e espulso dal suo corpo.

Oramai la vita de Hugo iera sensa scopo el stava tuto el zorno in casa zirando in tondo come un marmasal e co rivava le babaze de la canasta el coreva a serarse in bagno de la pudicizia che egli aveva. Ma un zorno che zorno! Etta iera in sto bagno padronale che netava la vasca de bagno in porcellana de Villa Santina. El colonel el iera stravacà sul divano de finta pele de pregio con la sua vestaja migliore di raso rosso de polimeri e fular negligentemente annodato al colo centopercento nylon quando sona el campanel de casa. Chi saranno? Ah, quele orende veciaze spussalenti de la canasta.

El povarazo ze iera dismentigà el salta su come una gazzella e el ze fionda in bagno dove che normalmente si chiudeva nelle quattro ore del gioco di carte. El entra tuto sudà afanà el vedi ste povare ciapete disidratate per aria sto posteriore mazilento sta gobeta dolze nol capissi più niente e pur essendo de ani soferente de impotentia coeundi el ghe salta addosso a Etta come il leone sulla tenera gazzella in tella savana. Ma prima gnanche de iniziar l'osceno amplesso el crola per tera morto de la emossion.

Cussì fu che Etta conservò per sempre il fiore de la sua innocenza ben custodito. Nel testamento de el colonel Hugo iera scrito che el ghe lassava la sua collesion de soldatini de piombo. Gaby ze ga sposà apena passato el periodo de streta vedovansa con el dr. Piorrea, impiegato de la Eurorezion, bravo zogar canasta.